قبل 4 شهور ... اذا بتحط حماسنا وقت منتخبنا بيلعبلو لعبة ( وغالبا ما بيترافق حماسنا مع شعور مذلة وفشل تعودنا عليو )
واذا بتحط نقاشاتنا ودفاعنا عن بلدنا وقت بهاجمها حدا غريب/شقيق وكيف ممنبحت علين
اذا بتحط هلشغلتين على طرف بيطلع معك انو السوري ما كان يحس بانتماء حقيقي وفعلي بيعكس فخر حقيقي ببلد ... او انو بحس فعلا انو هلأرض وهلعلم بمثلو ومعني بكل امورو وممنون لأنو الله خلقو بيحمل هلجنسية
قديش قصيرة فترة 4 شهور بعمر الشعوب وقديش شغلة عظيمة انك تخلق هويّة وانتماء بالاشخاص !
وبقولولك زمن المعجزات انتهى !!!
ايام منتديات أخوية كنت حس بمغالاة بالوطنية بشكل خاص من قبل المغتربين
بيوصفو شعورن (بالحنين) وحتى كتيرين بترجمو احاسيسن بمفردة (عشق)
شو بخلي المغترب يحس بهلحنين الرهيب ؟ صحن الفول والفتة ؟ شوارع قديمة يتمشى فيها وما بصرلو فرصة يدقق بتفاصيلها لأن كل تركيزو منصب على انو ما يتفشكل من كتر الاهتمام بشوارعنا!
صرت فكر انو ممكن سبب حنين هلشبيبة المغتربة انو كل واحد منن بينو وبين حالو بيعرف وقت حيموت ما حيكون الو أرض ليندفن فيها ... حيندفن غريب بهلكوكب
ما كنت بحياتي بحلم بمناصب ولا بمراتب ولا بسلطة او مرتبة مميزة ... وان كانت شغلات ضرورية حتى تقدر تعمل فرق او تغيير .. بس هنن كصفات ما بعرف ليش ما بحياتن جذبوني ..تاركن للمشتهي ...
بعرف بلدي على واقعا ممكن موت قبل ما شوفا عم تتحسن ايا تحسن ملحوظ بمعظم مجالاتها التعليمية والاقتصادية والثقافية والعلمية والفكرية وكلشي ممكن يخطر على بالك لزقو بهلسياق على مسؤوليتي... ومع هلشي رسالتي اني ابقى فيها ورح ابقى فيها ... بيكفيني مساحة مترين بمتر من هلأرض ... انتميلها وبعرف انها بتنتميلي ليحطوني فيها بسلام...
وحنعمرها يعني حنعمرها وما رح نبقى هامشيين ورح نرجع نمشي هلمرة لقدام .. عم احلم؟ عم يتهيألي؟ موهوم ؟ مخيلتي خصبة؟ افكاري سرمدية؟ عم حاول اسقط امنياتي علواقع البعيد عنها؟
احكي اللي بدك ياه ... بس بعد معجزة هلشعب صرت عدل قوائم المسلّمات بحياتي وحط على رأسها: "الشعب السوري بعمرو ما بموت" .. و"المستحيل" ما كان وما حيكون بحياتو جزء من ثقافة هلبلد او بتاريخ هلشعب
وبكرا ما ممكن يكون الا أحلى
الصورة فوق من السنة الماضية من لعبة للاتحاد الحلبي بنصف نهائي كأس الاتحاد الآسيوي
